ԵՊՀ տնտեսագիտության և կառավարման ֆակուլտետում տեղի ունեցավ հերթական գիտական սեմինարը։ «Մարդկային կապիտալ, ինստիտուտներ և տնտեսական զարգացում» խորագրով զեկուցմամբ հանդես եկան ֆակուլտետի դեկան, ԵՊՀ կառավարման և գործարարության ամբիոնի դոցենտ, տ.գ.թ. Կառլեն Խաչատրյանը և նույն ամբիոնի պրոֆեսոր, տ.գ.դ. Գագիկ Վարդանյանը։ Սեմինարին ներկա էին ֆակուլտետի պրոֆեսորադասախոսական համակազմի ներկայացուցիչներ և ասպիրանտներ։
Ներկայացված ուսումնասիրությունը կատարվել է ՀՀ բարձրագույն կրթության և գիտության կոմիտեի «Հեռավար լաբորատորիաների հիմնադրման ծրագիր» դրամաշնորհի («Մարդկային կապիտալի կառավարման հիմնախնդիրներն ու լուծումները Հայաստանի Հանրապետությունում») շրջանակում։ Սեմինարի ժամանակ ներկայացվեցին հետազոտության նախնական արդյունքները։
Զեկուցողները, հիմնվելով ֆորմալ ինստիտուտների և մարդկային կապիտալի փոխազդեցության շուրջ կատարված տեսական ու էմպիրիկ վերլուծությունների վրա, փորձել են գնահատել մարդկային կապիտալի և ինստիտուցիոնալ փխրունության փոխկապվածությունը տնտեսական զարգացման համատեքստում։
Սեմինարի շրջանակում բանախոսները ներկայացրին ժամանակակից տնտեսագիտական և ինստիտուցիոնալ տեսությունների վերջին մոտեցումները՝ շեշտելով, որ պետությունների զարգացման հիմքում ընկած են ոչ միայն տնտեսական ռեսուրսները, այլև կառավարման արդյունավետությունը, ինստիտուտների որակը և մարդկային կապիտալի պոտենցիալը։
Անդրադարձ եղավ ինստիտուցիոնալ խոցելիության պատճառներին ու հետևանքներին. ներկայացվեց, որ թույլ, ոչ կայուն կամ թափանցիկ ինստիտուտները սահմանափակում են պետության կարողությունը՝ ապահովելու անվտանգություն, արդարադատություն, կրթություն և առողջապահություն, իսկ դա փոխկապակցված է տնտեսական աճի դանդաղման և սոցիալական անհավասարության խորացման հետ։ Շեշտվեց մարդկային կապիտալի դերը ժամանակակից տնտեսություններում։ Ըստ բանախոսների՝ կրթված, հմտացած և պատասխանատու քաղաքացիներն են, որ ձևավորում են նորարարական ներուժը և ապահովում ինստիտուտների կայացումը։ Միևնույն ժամանակ մատնանշվեց, որ բարձրակարգ մասնագետների արտագաղթը նվազեցնում է երկրի ինստիտուցիոնալ կարողունակությունը, ինչն էլ իր հերթին է՛լ ավելի է խորացնում տնտեսական խնդիրները։
Ներկայացված զեկույցն առաջացրեց աշխույժ գիտական բանավեճ, որի ընթացքում իրենց նկատառումներով ու առաջարկություններով հանդես եկան պրոֆեսորներ Սամսոն Դավոյանը, Հայկ Սարգսյանը, Ռուբեն Գևորգյանը, ամբիոնների վարիչներ Ալվարդ Խառատյանը, Գրիգոր Հայրապետյանը և ուրիշներ։
Ամփոփելով գիտական սեմինարի քննարկման արդյունքները՝ Տնտեսագիտության և կառավարման ֆակուլտետի դեկան, հեռավար լաբորատորիայի համաղեկավար Կառլեն Խաչատրյանը շնորհակալություն հայտնեց սեմինարի մասնակիցներին կատարված հետազոտությանն առնչվող հարցադրումների և արժեքավոր առաջարկությունների համար։ Նա նշեց, որ ֆակուլտետում գիտական սեմինարների ձևավորված հարթակը հնարավորություն է ընձեռում նշանակալիորեն նպաստելու ոչ միայն տնտեսագիտական և կառավարման մտքի զարգացմանը, այլև գործնական մշակումներին, որոնք օգտակար կլինեն նաև Կառավարությանը տնտեսական զարգացմանը միտված արդյունավետ քաղաքականություն մշակելու տեսանկյունից։
Հիշեցնենք, որ ԵՊՀ տնտեսագիտության և կառավարման ֆակուլտետում մեկնարկել է գիտական սեմինարների շարք, որոնց մասնակցելու հնարավորություն ունեն ինչպես ԵՊՀ, այնպես էլ ՀՀ այլ համալսարանների պրոֆեսորադասախոսական համակազմի ներկայացուցիչներ, ուսանողներ և ասպիրանտներ։
