ԵՊՀ տնտեսագիտության և կառավարման ֆակուլտետի պրոֆեսոր Ռուբեն Գևորգյանը և փիլիսոփայության և հոգեբանության ֆակուլտետի դոցենտ Դավիթ Հայրապետյանը ԵՊՀ-ում անցկացրած գիտական սեմինարի ընթացքում ներկայացրին իրենց համահեղինակած «Նորություններից մինչև կանխատեսումներ. նարատիվների էկոնոմետրիկա արժեթղթերի շուկաներում» թեմայով հետազոտությունը, որը հրապարակվել է հեղինակավոր «Journal of Risk and Financial Management» գիտական ամսագրում («From Headlines to Forecasts: Narrative Econometrics in Equity Markets»):
Միջգիտակարգային այս հետազոտությունը ուսումնասիրում է, թե ինչպես կարող են նորությունների հիման վրա բացահայտել հատուկ նարատիվներ (news narratives), որոնք կարող են բարելավել բաժնետոմսերի եկամտաբերության կանխատեսման ավանդական մոդելները։ Հեղինակները, կիրառելով ժամանակակից արհեստական բանականության մեթոդները՝ «BERTopic», «BERT embeddings», վերլուծել են «Microsoft» ընկերության լրատվական հոսքը և առանձնացրել են երեք հիմնական նարատիվային խմբեր՝ մեդիա և հանրային ընկալումները, արժութային և մակրոտնտեսական միջավայրը, ինչպես նաև տեխնոլոգիական ու կիսահաղորդչային էկոհամակարգը։
Արդյունքները ցույց են տվել, որ լրատվական դաշտի նարատիվները զգալի ազդեցություն ունեն ընկերության բաժնետոմսերի եկամտաբերության վրա։ Հատկապես մեդիայի և հանրային ընկալման հետ կապված թեմաները կարող են ազդարարել շուկայական փոփոխություններ և կանխատեսել եկամտաբերության տատանումները։
Սեմինարի ընթացքում հեղինակները ներկայացրին իրենց մշակած մեթոդաբանական նոր մոտեցումը, որը համադրում է ժամանակային շարքերի վերլուծությունն ու բնական լեզվի մշակումը (NLP)՝ ձևավորելով նոր ուղղություն ֆինանսական տվյալագիտության և վարքագծային տնտեսագիտության հատման կետում։
Սույն հետազոտությամբ հեղինակները ցույց տվեցին, որ ֆինանսական շուկաների վերլուծության մեջ հնարավոր է ներառել նաև սոցիալական և հաղորդակցական գործոններ՝ ապահովելով առավել ճշգրիտ կանխատեսումներ։ Հեղինակների խոսքով՝ առաջարկվող մոտեցումը կարող է մասշտաբավորվել և կիրառվել տարբեր ընկերությունների ու ոլորտների համար՝ պայմանով, որ առկա լինի բավարար լրատվական տվյալների բազա։
Հետազոտության արդյունքները կարևոր ներդրում են տվյալահենք ֆինանսական վերլուծության և արհեստական բանականության կիրառման ոլորտում՝ ցույց տալով, որ տնտեսական գործընթացները հաճախ կարելի է հասկանալ ոչ միայն թվերի, այլև պատմությունների միջոցով։
Սեմինարին ներկա էին ֆակուլտետի պրոֆեսորադասախոսական համակազմի ներկայացուցիչներ և ասպիրանտներ։ Հիշեցնենք, որ ԵՊՀ տնտեսագիտության և կառավարման ֆակուլտետում մեկնարկել է գիտական սեմինարների շարք, որոնց մասնակցելու հնարավորություն ունեն ինչպես ԵՊՀ, այնպես էլ ՀՀ այլ համալսարանների պրոֆեսորադասախոսական համակազմի ներկայացուցիչներ, ուսանողներ և ասպիրանտներ։
