ԵՊՀ տնտեսագիտության և կառավարման ֆակուլտետը 2025-2026 ուստարում ունի բակալավրիատի առկա ուսուցման համակարգի 146, հեռակա՝ 46 և մագիստրատուրայի առկա ուսուցման համակարգի 67, հեռակա՝ 33 շրջանավարտներ: Դիպլոմների հանձնման հանդիսավոր արարողությանը ներկա էին ԵՊՀ պրոռեկտոր Էլինա Ասրիյանը, ԵՊՀ տնտեսագիտության և կառավարման ֆակուլտետի դեկան Կառլեն Խաչատրյանը, հրավիրյալ շրջանավարտներ, հյուրեր:
Հանդիսավոր արարողությանը ԵՊՀ տնտեսագիտության և կառավարման ֆակուլտետի դեկան, տ.գ.թ., դոցենտ Կառլեն Խաչատրյանը շնորհավորեց շրջանավարտներին՝ հորդորելով շարունակաբար կատարելագործել գիտելիքները, համարձակորեն առաջ շարժվել և միշտ հավատարիմ մնալ մարդկային արժեքներին։
«Պատիվ է ԵՊՀ շրջանավարտ լինելը, բայց միաժամանակ նաև մեծ պատասխանատվություն է։ Ձեր խոսքն ու քայլերն այսուհետ շատերի համար կլինեն օրինակ, իսկ ձեր հաջողությունները նաև ֆակուլտետի հաջողություններն են»,- դիմելով շրջանավարտներին՝ նշեց նա և կարևորեց այն արժեքները, որոնք, անկախ ժամանակների փոփոխությունից, շարունակում են մնալ կարևոր՝ ազնվությունը, պատասխանատվությունը, աշխատասիրությունն ու մարդկային վերաբերմունքը։
«Մասնագետներ շատ կան, սակայն մարդիկ միշտ փնտրում են այն մասնագետին, որին կարող են վստահել։ Ամենամեծ կապիտալը ոչ միայն մարդու գիտելիքն է, այլ նաև նրա հեղինակությունը։ Այն կառուցվում է տարիներով, սակայն կարող է կորսվել մեկ սխալ որոշմամբ»,- ընդգծեց Կառլեն Խաչատրյանը։
Դեկանը վստահություն հայտնեց, որ շրջանավարտներից շատերը կդառնան ապագա ղեկավարներ, գիտնականներ, տնտեսագետներ, գործարարներ և նորարարներ՝ իրենց ներդրումն ունենալով երկրի զարգացման գործում։
«Վստա՛հ եղեք, որ դուք իրապես մրցունակ կրթություն եք ստացել։ Մեր ֆակուլտետի տված կրթության լավագույն գնահատականը մեր շրջանավարտներն են և նրանց արձանագրած հաջողությունները։ Թող ձեր գիտելիքը ծառայի մարդկանց, ձեր հաջողությունը՝ Հայաստանին, իսկ ձեր անունը միշտ հնչի արժանապատվությամբ»,- եզրափակեց դեկանը։
ԵՊՀ պրոռեկտոր Էլինա Ասրիյանը, շնորհավորելով շրջանավարտներին, կարևորեց տնտեսագիտական մտածողության մեջ ընտրությունների և պատասխանատվության դերը։
«Տնտեսագիտական մասնագիտությունները երբեք միայն փողի մասին չեն եղել, դրանք ընտրության մասին են։ Իրականում մեր ամբողջ կյանքը սահմանափակ ռեսուրսների պայմաններում որոշումների հաջորդականություն է, իսկ այդ ռեսուրսներից ամենասահմանափակը ժամանակն է։ Այսօր համալսարանը հենց այդ ռեսուրսն է վերադարձնում ձեզ։ Ձեր դիպլոմը ոչ միայն հաջողության երաշխիք է, այլ նաև վկայություն, որ դուք սովորել եք սովորել։ Եվ, թերևս, հենց սա է 21-րդ դարի ամենակարևոր հմտությունը։ Ապագայում կփոխվեն մասնագիտություններն ու տեխնոլոգիաները, սակայն միշտ պահանջված կլինեն մարդիկ, որոնք կարողանում են մտածել, ճիշտ հարցեր տալ և պատասխանատու որոշումներ կայացնել»,- ասաց Էլինա Ասրիյանը։
Ամփոփելով իր խոսքը՝ ԵՊՀ պրոռեկտորը շեշտեց, որ համալսարանում ստացած գիտելիքները կծառայեն ոչ միայն շրջանավարտների անձնական հաջողություններին, այլև հասարակության, տնտեսության և Հայաստանի Հանրապետության զարգացմանը։
«Եթե տարիներ անց, հետ նայելով ձեր անցած ճանապարհին, կարողանաք ասել. «Ես կայացրել եմ որոշումներ, որոնց համար երբեք չեմ ամաչել», ապա դա կլինի ձեր կրթության ամենամեծ ձեռքբերումը»,- եզրափակեց նա։
Շնորհավորական ուղերձներով հանդես եկան նաև ֆակուլտետի նախորդ տարիների շրջանավարտները՝ ՀՀ բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանը, ՀՀ վարչապետին կից Հայաստանի գիտության և տեխնոլոգիաների զարգացման խորհրդի անդամ, «Strategic Value Ventures» ընկերության հիմնադիր, «UC Berkeley SkyDeck» աքսելերատորի գլխավոր խորհրդական և համաշխարհային դեսպան Կարեն Գյուլբուդաղյանը, «Ամերիաբանկ»-ի տնօրինության անդամ, ֆինանսական գծով տնօրեն Հովհաննես Թորոյանը, ՄԱԿ-ի զարգացման ծրագրի (ՄԱԶԾ) հայաստանյան գրասենյակի սոցիալ-տնտեսական զարգացման ծրագրերի ղեկավար Աննա Գյուրջյանը և «Հայաստանի մանուկներ» հիմնադրամի (ՔՈԱՖ) բիզնես ծրագրերի ղեկավար Շուշանիկ Դանիելյանը։
Նախորդ տարիների շրջանավարտներն իրենց խոսքում կարևորեցին շարունակական կրթության, աշխատասիրության, սեփական ուժերին վստահելու և սխալներից չվախենալու անհրաժեշտությունը՝ ներկա սերնդի ներկայացուցիչներին մաղթելով գտնել իրենց մասնագիտական ուղին և տարիներ անց վերադառնալ ֆակուլտետ՝ որպես կայացած ու հաջողակ մասնագետներ։
Ելույթներին հաջորդեց ավարտական վկայականների հանձնման հանդիսավոր արարողությունը։
