Գերմանական բանասիրության ամբիոնի նախաձեռնությամբ և ԵՊՀ աջակցությամբ կայացավ գերմաներենի ուսուցիչների մասնագիտական աշխատարանը՝ նվիրված դասի ժամանակ ուսուցչի և աշակերտի գիտակցված ուշադրությանը: Աշխատարանը միավորել էր հանրակրթական դպրոցների գերմաներենի ուսուցիչների՝ փորձի փոխանակման և մեթոդական հմտությունների խորացման նպատակով։
Սեմինարավարոն էր «Ernst Klett Verlag» միջազգային հրատարակչության փորձագետ, գերմաներենի մեթոդիստ Ջենիֆեր Սվանդան, որը ներկայացրեց ժամանակակից լեզվադիդակտիկայի այն սկզբունքները, որոնք ուղղված են ուսուցման արդյունավետության բարձրացմանը։
Ըստ Գերմանական բանասիրության ամբիոնի վարիչ Գայանե Սավոյանի՝ ժամանակակից աշխարհում, երբ տեղեկատվական հոսքերն անընդհատ աճում են, և բազմապատկվում են սոցիալական և հոգեբանական մարտահրավերները, մանկավարժի գործը դարձել է ամենաբարդ և պատասխանատու մասնագիտություններից մեկը։ Ուսուցիչը միաժամանակ կազմակերպիչ է, առաջնորդ, հոգեբան և դաստիարակ։ Այս պայմաններում խիստ անհրաժեշտ են ներքին հանգստությունը, կայուն նյարդային համակարգը, ինքնակառավարումը և ինքնատիրապետումը։ Առանց այս հատկանիշների դժվար է ապահովել արդյունավետ ուսումնական միջավայր և պահպանել դասարանի դրական մթնոլորտը։
Սեմինարավար Ջենիֆեր Սվանդան ներկայացրեց «Achtsamkeit» թեման՝ գիտակցված ուշադրությունն ու ներկա պահի կենտրոնացումը ոչ միայն որպես անձնական զարգացման գործիք, այլև որպես դասավանդման կարևոր մեթոդական սկզբունք։ Նա շեշտեց, որ գիտակցված հանգստությամբ և ուշադրությամբ կառուցված դասը նպաստում է սովորողների ներգրավվածությանը և նվազեցնում սթրեսը: Այն նաև ստեղծում է փոխադարձ հարգանքի և վստահության մթնոլորտ ու խթանում աշակերտների ակտիվությունը։ Գյոթեի անվան ինստիտուտի փորձառու վերապատրաստող, դասախոս Մերի Նավասարդյանը հավելեց, որ գիտակցված ուշադրությունը և զգայունությունը ժամանակակից մեթոդաբանության մեջ հաջողված դասի կարևոր գործոններ են: Վերջիններս նպաստում են ինչպես ուսուցման արդյունավետության բարձրացմանը, այնպես էլ սովորողների վարքի կարգավորմանը։
Աշխատանքի ընթացքում ուսուցիչները ծանոթացան և գործնականում կատարեցին մի շարք վարժանքներ, որոնք կարող են կիրառել ինչպես իրենց ներքին հավասարակշռությունը պահպանելու, այնպես էլ դասարանը արդյունավետ կառավարելու համար (օրինակ՝ շնչառական կարճ վարժությունները դասի սկզբում՝ ուշադրությունը կենտրոնացնելու համար)։
Աշխատարանը դարձավ մասնագիտական երկխոսության արդյունավետ միջավայր՝ ամրապնդելով ինչպես տեսական գիտելիքները, այնպես էլ գործնական կարողությունները։ Գերմանական բանասիրության ամբիոնը կարևորում է նման նախաձեռնությունները որպես շարունակական մասնագիտական զարգացման և կրթության որակի բարձրացման կարևոր միջոց։
