Միջազգային հարաբերությունների և դիվանագիտության ամբիոն

Ամբիոնն ստեղծվել է 1993 թ․։ Ամբիոնի առաջին վարիչը եղել է պ․գ․դ․, պրոֆեսոր Էդիկ Զոհրաբյանը։ Մինչև 1998 թ․ «Միջազգային հարաբերությունների պատմության և տեսության ամբիոն» անվանմամբ այն գործել է պատմության ֆակուլտետի կազմում։ 1998 թ․՝ միջազգային հարաբերությունների ֆակուլտետի ստեղծումից հետո, ամբիոնը վերանվանվել է միջազգային հարաբերությունների և դիվանագիտության ամբիոն և ընդգրկվել միջազգային հարաբերությունների ֆակուլտետի կազմում։

Ամբիոնի պրոֆեսորադասախոսական կազմը ծավալում է գիտամանկավարժական ակտիվ գործունեություն։ Գիտահետազոտական աշխատանքներ են ընթանում հետևյալ ուղղություններով՝

• հայ դիվանագիտության և ՀՀ արտաքին քաղաքականության հիմնահարցեր,
• միջազգային հարաբերությունների ժամանակակից գործընթացներ,
• համաշխարհային և տարածաշրջանային ինտեգրացիոն գործընթացներ,
• գլոբալ և տարածաշրջանային անվտանգության հիմնահարցեր։

Ամբիոնի նախաձեռնությամբ անցկացվում են հանրապետական և միջազգային գիտաժողովներ, գիտական նստաշրջաններ։ Պարբերաբար կազմակերպվում են հանդիպումներ ՀՀ-ում հավատարմագրված օտարերկրյա դիվանագիտական ներկայացուցիչների, ինչպես նաև արտասահմանյան գիտական և կրթական առաջատար հաստատություններից հրավիրված մասնագետների հետ։

Ամբիոնն իրականացնում է «Միջազգային հարաբերություններ» բակալավրիատական և «Միջազգային հարաբերություններ» (առկա և հեռակա), «Համաշխարհային քաղաքականություն» մագիստրոսական կրթական ծրագրերը։

«Համաշխարհային քաղաքականություն» մագիստրոսական կրթական ծրագիրը միացված է ԱՊՀ ցանցային համալսարանին, և սկսած 2013 թվականից՝ այն իրականացվում է Ժողովուրդների բարեկամության ռուսաստանյան համալսարանի (РУДН) հետ համատեղ, և կրթական ծրագրի շրջանավարտներն ստանում են կրկնակի դիպլոմ։

Ամբիոնի վարիչն է պատմական գիտությունների թեկնածու, դոցենտ Ժակ Մանուկյանը։