ԵՊՀ տնտեսագիտության և կառավարման ֆակուլտետի տնտեսագիտության և միջազգային տնտեսական հարաբերությունների ամբիոնի վարիչ, միջազգային կապերի պատասխանատու Գրիգոր Հայրապետյանը, Կառավարման և գործարարության ամբիոնի դոցենտ Նարինե Միրզոյանը և ֆակուլտետի ասպիրանտ, դասախոս Ալիսա Գևորգյանը մասնակցել են ս․թ․ օգոստոսի 25–28-ը Բուլղարիայի Սոֆիա քաղաքում Տարածաշրջանային գիտության եվրոպական ասոցիացիայի (ERSA) կազմակերպած 65-րդ միջազգային գիտաժողովին:
«ՀՀ տնտեսական ռիսկերի կառավարման կառուցակարգի կատարելագործումը տարածաշրջանային զարգացուﬓերի համատեքստում» (25RG-5B128) դրամաշնորհային ծրագրի շրջանակում Գրիգոր Հայրապետյանը և Նարինե Միրզոյանը ներկայացրել են «Բարձր որակավորում ունեցող մասնագետների արտագաղթը որպես մակրոտնտեսական ռիսկ տարածաշրջանային զարգացումների համատեքստում. Հայաստանի օրինակը» («High-Skilled Emigration as a Macroeconomic Risk in the Context of Regional Developments: The Case of Armenia») թեմայով հետազոտությունը։
Նշենք, որ դրամաշնորհային ծրագրի ղեկավարը ԵՊՀ կառավարման և գործարարության ամբիոնի դոցենտ Նոննա Խաչատրյանն է, իսկ օտարերկրյա գործընկերը՝ տնտեսագիտության դոկտոր Թոմաս Պոնսե Դենտինոն (Ազորեի համալսարան, Պորտուգալիա):
«Ասպիրանտների և երիտասարդ հայցորդների հետազոտությունների աջակցության ծրագիր – 2024» («Տնտեսական հարաբերությունների թվայնացման խնդիրները ՀՀ-ում», 24AA-5B049) դրամաշնորհային ծրագրի շրջանակում գիտաժողովին մասնակցել է նաև ծրագրի ղեկավար Ալիսա Գևորգյանը։ Նա ներկայացրել է «Տեղահեն (լոկալիզացված) հետազոտություն կայուն զարգացման քաղաքականությունների համար․ աշխարհի երկրների գլոբալ և տեղական (լոկալ) դիտարկումը՝ ընդհանրացված Q-վերլուծության միջոցով» («Place-Based Research for Sustainable Development Policies: A Global / Local View of World Countries Using Generalized Q Analysis») հետազոտությունը՝ անդրադառնալով կայուն զարգացման քաղաքականությունների ձևավորման գործընթացում տեղայնացված հետազոտական մոտեցումների կիրառման հնարավորություններին։
Գրիգոր Հայրապետյանը նաև նախագահել է «G17-2 աշխարհաքաղաքականություն, աշխարհատնտեսություն, հակամարտություններ և անվտանգություն․ տարածական ազդեցությունները և տարածաշրջանային արձագանքները» («G17-2 Geopolitics, Geo-economics, Conflicts and Security, Spatial Impacts and Regional Responses») խորագրով նիստը։
Գիտաժողովի շրջանակում ներկայացված զեկույցները և ծավալված մասնագիտական քննարկումները կարևոր հարթակ էին հետազոտությունների արդյունքները միջազգային գիտական հանրությանը ներկայացնելու, ոլորտի առաջատար հետազոտողների հետ մասնագիտական մտքերի փոխանակման և հետազոտական մոտեցումների վերաբերյալ նոր դիտարկումներ ստանալու համար։ Նման միջազգային գիտական միջոցառումներին ԵՊՀ տնտեսագիտության և կառավարման ֆակուլտետի պրոֆեսորադասախոսական անձնակազմի ներկայացուցիչների մասնակցությունը նպաստում է հետազոտական համագործակցությունների ընդլայնմանը և ֆակուլտետի գիտական ներուժի ու միջազգային ակադեմիական կապերի զարգացմանը։
