ԵՊՀ տնտեսագիտության և կառավարման ֆակուլտետում շարունակվում են դիմորդների հետ տարվող ակտիվ և հետևողական աշխատանքները՝ ուղղված նրանց մասնագիտական կողմնորոշմանը: Դիմորդների հետ տարվող աշխատանքների արդյունավետ համակարգման նպատակով ֆակուլտետի դեկանի հրամանով ձևավորվել և արդյունավետ գործունեություն է ծավալում Դիմորդների հետ տարվող աշխատանքների աշխատանքային խումբը:
Աշխատանքային խմբի, պրոֆեսորադասախոսական անձնակազմի և ուսանողական կառույցների ներկայացուցիչների համատեղ ջանքերով ապահովվում է արդյունավետ հաղորդակցություն ապագա դիմորդների հետ: Դիմորդների հետ տարվող աշխատանքները ֆակուլտետում դիտարկվում են որպես երկարաժամկետ ներդրում, որը նպաստում է որակյալ ու արդյունավետ կրթական միջավայրի ձևավորմանը:
Ֆակուլտետում հաղորդակցության տարբեր ձևաչափերի կիրառմամբ լուրջ ջանքեր են գործադրվում ապագա դիմորդների մասնագիտական կողմնորոշման գործընթացում, ինչը կարևոր է ոչ միայն տեղեկության արդյունավետ փոխանցման, այլև հետադարձ կապի ապահովման տեսանկյունից։ Դրանք հնարավորություն են տալիս հասկանալու ապագա դիմորդների ակնկալիքները, ուսումնասիրելու և համակողմանի վերլուծելու նրանց կարիքներն ու հետաքրքրությունները և արդյունքում ձևավորելու ավելի հասցեական ու արդյունավետ հաղորդակցության համակարգ։
2025 թվականի ընթացքում ԵՊՀ տնտեսագիտության և կառավարման ֆակուլտետի նախաձեռնությամբ և ԵՊՀ ընդունելության և դիմորդների հետ տարվող աշխատանքների կենտրոնի աջակցությամբ կազմակերպվել են բազմաթիվ այցեր Երևանի և հարակից մարզերի ավագ դպրոցներ և քոլեջներ։ Հանդիպումներն ունեին ոչ միայն ներկայացուցչական, այլև տեղեկատվական և խորհրդատվական բնույթ: Ապագա դիմորդներին ներկայացվել են ԵՊՀ ընձեռած կրթական և մասնագիտական զարգացման հնարավորությունները, այդ թվում՝ ֆակուլտետի կրթական ծրագրերը, ընդունելության վերաբերյալ մանրամասները, ԵՊՀ գիտակրթական հնարավորությունները, միջազգային համագործակցության և փոխանակման ծրագրերը, ուսանողական կյանքի առանձնահատկությունները, ինչպես նաև աշխատաշուկայի պահանջարկը ֆակուլտետում գործող բակալավրի երեք՝ «Տնտեսագիտություն», «Կառավարում» և «Ֆինանսներ» կրթական ծրագրերի գծով։
Միայն 2025 թվականի ընթացքում ֆակուլտետի ավելի քան երկու տասնյակ դասախոսների մասնակցությամբ իրականացվել են բազմաթիվ այցեր դեպի դպրոցներ և քոլեջներ, որոնց մասնակցել են հարյուրավոր աշակերտներ:
Դիմորդների հետ տարվող աշխատանքներում հաղորդակցության ձևերը պլանավորելիս առաջնահերթ տեղ է հատկացվում ակտիվ մասնակցային հաղորդակցությանը, որը հնարավորություն է տալիս ապագա դիմորդներին առավել լավ պատկերացնելու մասնագիտության առանձնահատկությունները և կատարելու առավել գիտակցված ու հիմնավորված ընտրություն։
2025 թվականի ընթացքում ֆակուլտետում հյուրընկալվել են բազմաթիվ դպրոցներից ժամանած աշակերտներ, որոնց հնարավորություն է տրվել ներկա գտնվելու դասախոսությունների, ծանոթանալու ֆակուլտետի լսարանների տեխնիկական հագեցվածությանը, հանդիպելու ուսանողների և դասախոսների հետ, ինչպես նաև մասնակցելու տեղեկատվական քննարկումների։ Հաղորդակցության այս ձևաչափը արդեն 3-րդ տարին է կիրառվում, և փորձը ցույց է տալիս, որ այն կարևոր նշանակություն ունի վստահության կառուցման գործընթացում և ապահովում է բարձր արդյունավետություն:
Չսահմանափակվելով փոխադարձ այցերով՝ ֆակուլտետում 2023-2024 ուստարվա գարնանից մեկնարկել և երկու շրջափուլով անցկացվում է «ԵՊՀ տնտեսագիտական դպրոց» ծրագիրը:
Բովանդակությամբ և ուղղվածությամբ լինելով աննախադեպ՝ «ԵՊՀ տնտեսագիտական դպրոց» երկօրյա ծրագիրը իրականացվում է ԵՊՀ տնտեսագիտության և կառավարման ֆակուլտետի նախաձեռնությամբ և ԵՊՀ ընդունելության և դիմորդների հետ տարվող աշխատանքների կենտրոնի աջակցությամբ: Այն միտված է ամրապնդելու բուհ-դպրոց համագործակցությունը, ինչպես նաև օգնելու բարձր դասարանների աշակերտներին մասնագիտական կողմնորոշման հարցում։ «ԵՊՀ տնտեսագիտական դպրոց» երկօրյա ծրագրի նպատակն է խթանել մասնագիտական կողմնորոշումը և հնարավորություն ընձեռել ավագ դպրոցի 11-րդ և 12-րդ դասարանների աշակերտներին մասնագիտական կողմնորոշման հարցում: Ծրագրին արդեն հասցրել է մասնակցել ավելի քան հազար աշակերտ Երևանի և ՀՀ տարբեր մարզերի շուրջ ութ տասնյակից ավելի դպրոցներից: Տարեցտարի մասնակից դպրոցների և աշակերտների թիվը դինամիկ կերպով աճում է՝ վկայելով այն մասին, որ ծրագիրն իրապես պահանջված է և արդյունավետ: Ծրագրի 2025-2026 ուստարվա գարնանային շրջափուլի գրանցումները արդեն մեկնարկել են, որոնց հասցրել են գրանցվել մեծ թվով աշակերտներ Երևան քաղաքի և հարակից մարզերի դպրոցներից:
Տնտեսագիտության և կառավարման ֆակուլտետը դիմորդների հետ տարվող աշխատանքները կատարում է բաց և հասանելի լինելու, ինչպես նաև վստահելի հարաբերություններ կառուցելու հանձնառությամբ։ Ֆակուլտետում դիմորդների հետ տարվող աշխատանքների շրջանակում իրականացվող ծրագրերն ու նախաձեռնությունները մեկ կարևոր նպատակ ունեն՝ բարձրացնելու դիմորդների իրազեկվածությունը և ապահովելու դիմորդների բազայի որակի շարունակական զարգացումը:
