ԵՊՀ տնտեսագիտության և կառավարման ֆակուլտետում հյուրընկալվեցին Ուզբեկստանի Մամուն համալսարանի տնտեսագիտության ֆակուլտետի դեկան Էրգաշ Իբադուլլաևը և միջազգային համագործակցության գծով փոխդեկան Մուրոդջոն Մատնիյազովը։
Հանդիպման ընթացքում ԵՊՀ տնտեսագիտության և կառավարման ֆակուլտետի դեկան Կառլեն Խաչատրյանը ներկայացրեց ֆակուլտետի զարգացման առաջնահերթությունները՝ շեշտադրելով միջազգային համագործակցության ընդլայնման կարևորությունը կրթության որակի բարձրացման և գիտահետազոտական գործունեության ակտիվացման համատեքստում։ Մամուն համալսարանի տնտեսագիտության ֆակուլտետի դեկան Էրգաշ Իբադուլլաևը, անդրադառնալով Մամունի համալսարանի կառուցվածքային առանձնահատկություններին, ընդգծեց Տնտեսագիտության ֆակուլտետի կրթական և գիտական ներուժը:
Քննարկվեցին երկու կառույցների միջև գործընկերության զարգացման հնարավոր ուղղությունները՝ ակադեմիական շարժունակության, ուսանողական և դասախոսական փոխանակումների, գիտահետազոտական համատեղ աշխատանքների, կրթական ծրագրերի իրականացման, փորձի փոխանակման, ինչպես նաև դասախոսական կազմի վերապատրաստման ուղղություններով՝ առկա, առցանց և հիբրիդային ձևաչափերով։
Կողմերն առանձնահատուկ կարևորեցին այն հանգամանքը, որ համագործակցության հիմքում առկա է կրթական և գիտական ներուժի համադրելիություն․ Մամուն համալսարանի տնտեսագիտության ֆակուլտետը ուսանողական ընդգրկվածության և գիտական ակտիվության առումով մոտ է ԵՊՀ տնտեսագիտության և կառավարման ֆակուլտետին։ Այս հանգամանքը դիտարկվեց որպես արդյունավետ և փոխշահավետ համագործակցության կարևոր նախադրյալ՝ կրթական համատեղ նախաձեռնությունների իրականացման և գիտահետազոտական գործունեության զարգացման տեսանկյունից։ Գործընկեր կառույցների դեկանները ընդգծեցին համատեղ գիտական հետազոտությունների խթանման անհրաժեշտությունը՝ այն դիտարկելով որպես նշանակալի քայլ ոչ միայն երկու բուհերի ակադեմիական կապերի խորացման, այլև տարածաշրջանային և միջազգային գիտակրթական միջավայրում նրանց դիրքի ամրապնդման տեսանկյունից։
Ձեռք բերվեց նաև պայմանավորվածություն, որի շրջանակում ԵՊՀ ուսանողները կմասնակցեն Մամուն համալսարանում 2026 թվականի օգոստոսին կայանալիք ամառային դպրոցին։ Միաժամանակ, դեկան Կառլեն Խաչատրյանը ուզբեկ գործընկերներին հրավիրեց մասնակցելու աշնանը ֆակուլտետում կայանալիք միջազգային տնտեսագիտական 3-րդ գիտաժողովին։ Հանդիպման ընթացքում ստորագրվեց նաև համագործակցության հուշագիր՝ նպատակ ունենալով ձևավորելու երկու բուհերի միջև երկարաժամկետ և կայուն գործընկերային հարաբերություններ։
ԵՊՀ տնտեսագիտության և կառավարման ֆակուլտետը կարևորում է նմանատիպ հանդիպումները որպես միջազգային համագործակցության արդյունավետ հարթակ, որն աջակցում է ԵՊՀ ռազմավարական նպատակներին՝ բարձրացնել կրթության որակը, ընդլայնել արտաքին կապերը և խթանել գիտահետազոտական ներուժի զարգացումը։ Մամուն համալսարանի ներկայացուցիչների այցը ևս մեկ անգամ հաստատեց, որ նման նախաձեռնությունները կարող են դառնալ կայուն և փոխշահավետ ակադեմիական գործընկերության հիմք։
Հանդիպմանը մասնակցում էին ԵՊՀ տնտեսագիտության և կառավարման ֆակուլտետի ղեկավար կազմի և պրոֆեսորադասախոսական անձնակազմի ներկայացուցիչներ։
