ԵՊՀ տնտեսագիտության և կառավարման ֆակուլտետում անցկացվեց «Համալսարանների դերը մարդկային կապիտալի ստեղծման գործում» թեմայով առցանց դասախոսություն։ Բանախոսը Կանադայի Մաք-Մասթերի համալսարանի (McMaster University) պրոֆեսոր Բրյուս Նյուբոլդն էր։
Դասախոսության մեկնարկին ներկաներին ողջունեց ԵՊՀ տնտեսագիտության և կառավարման ֆակուլտետի դեկան, դոցենտ Կառլեն Խաչատրյանը՝ երախտագիտություն հայտնելով բանախոսին համագործակցության պատրաստակամության համար և կարևորելով նախաձեռնության դերը ուսանողների մասնագիտական կայացման գործում։ Նրա խոսքով՝ նման ձևաչափով հանդիպումները հնարավորություն են ընձեռում ուսանողներին անմիջական շփում ունենալու միջազգային ակադեմիական համայնքի ներկայացուցիչների հետ և ծանոթանալու տարբեր երկրների փորձին:
Դասախոսության ընթացքում անդրադարձ կատարվեց համալսարանների առանցքային դերին մարդկային կապիտալի ձևավորման գործընթացում, կրթության և մասնագիտական կարողությունների փոխկապակցվածությանը, ինչպես նաև միգրացիայի ազդեցությանը՝ երկրի մարդկային ներուժի զարգացման վրա։ Քննարկման կարևոր ուղղություններից էր նաև Հայաստանում մարդկային կապիտալի զարգացման հեռանկարը, հատկապես՝ աշխատաշուկայի արդի պահանջների և կրթական համակարգի փոխհարաբերությունների համատեքստում։
Բրյուս Նյուբոլդը ներկայացրեց Կանադայի փորձը՝ ընդգծելով, որ համալսարանները ոչ միայն գիտելիքի փոխանցման, այլև մրցունակ մասնագետների ձևավորման կարևոր կենտրոններ են։ Նրա դիտարկմամբ՝ կրթական միջավայրը, գիտահետազոտական գործունեությունը և աշխատաշուկայի կարիքներին արձագանքող հմտությունները միասին են ստեղծում մարդկային կապիտալի բարձր որակ։ Միաժամանակ, քննարկման ընթացքում առանձնացվեց ուրբանիզացիայի ազդեցությունը՝ որպես կրթության, աշխատանքի և կյանքի որակի ձևավորման կարևոր գործոն։
Դասախոսության ընթացքում անդրադարձ կատարվեց նաև մասնագիտական որակի և կյանքի մակարդակի փոխկապակցվածությանը։ Նշվեց, որ բարձր որակավորում ունեցող մասնագետները, որպես կանոն, ունենում են ոչ միայն ավելի բարձր եկամուտներ, այլև մասնագիտական ընտրության ավելի լայն հնարավորություններ։ Այս համատեքստում կարևորվեց նաև մարդկային կապիտալի զարգացման դերը «ուղեղների արտահոսքի» նվազեցման գործում․ համապատասխան պայմանների առկայության դեպքում առավել հավանական է, որ մասնագետներն իրենց ներուժը իրացնեն հենց երկրում՝ նպաստելով դրա տնտեսական զարգացմանը։
Հանդիպմանը ներկա էին ֆակուլտետի տարբեր կուրսերի ուսանողներ և պրոֆեսորադասախոսական կազմի ներկայացուցիչներ: Բանախոսության ավարտին հնչած բազմաթիվ հարցերը վկայեցին թեմայի նկատմամբ ուսանողների բարձր հետաքրքրվածության և ակտիվ ներգրավվածության մասին։
Հանդիպման ընթացքում ուսանողները և դասախոսները ներկայացրին իրենց դիտարկումները՝ համադրելով Կանադայի ու Հայաստանի փորձը: Ուսանողների հարցադրումների շարքում առանձնացավ «Տնտեսագիտություն» կրթական ծրագրի 2-րդ կուրսի ուսանող Ֆելիքս Խանգելդյանի հարցը․ «Որքանո՞վ է ճիշտ Հայաստանի զարգացումը դիտարկել Կանադայի օրինակով, և հնարավո՞ր է արդյոք այդ փորձը կիրառել մեր պայմաններում»։
Արձագանքելով հարցին՝ պրոֆեսորը ընդգծեց, որ երկրների միջև ուղիղ համեմատությունները միշտ չէ, որ արդյունավետ են, սակայն հաջողված փորձի ուսումնասիրությունն ու տեղայնացումը կարող են կարևոր հիմք դառնալ զարգացման համար։ Նրա դիտարկմամբ՝ խնդիրը այլ երկրների փորձը կրկնօրինակելը չէ, այլ սեփական իրականությանը համապատասխան արդյունավետ լուծումներ գտնելը։
Ֆելիքս Խանգելդյանը, պատմելով իր տպավորությունների մասին, նշեց. «Արդեն երկրորդ անգամ եմ մասնակցում նման ձևաչափով դասախոսության, և այն ինձ շատ է դուր գալիս։ Այն նպաստում է քննադատական մտածողության զարգացմանը, ինչի շնորհիվ սկսեցի ավելի խորությամբ վերլուծել Հայաստանում առկա խնդիրներն ու անհրաժեշտ փոփոխությունները, ինչպես նաև իմ հնարավոր դերը այդ գործընթացում։ Ես հասկացա, որ մարդկային կապիտալը միայն պետական քաղաքականության արդյունք չէ, այլ նաև յուրաքանչյուրիս պատասխանատվությունն է՝ մշտապես զարգանալ, սովորել և ներդրում ունենալ հասարակության մեջ»։
Նշենք, որ ԵՊՀ տնտեսագիտության և կառավարման ֆակուլտետում մեկնարկել է օտարերկրյա գիտնականների առցանց դասախոսությունների շարք՝ ուղղված ուսանողների մտահորիզոնի ընդլայնմանը, միջազգային ակադեմիական միջավայրի հետ հաղորդակցության խթանմանը և ակտիվ ուսումնառության խրախուսմանը։
