Երևանի պետական համալսարանի տնտեսագիտության և կառավարման ֆակուլտետում հյուրընկալվել էր ՌԴ Վյատկայի պետական համալսարանի տնտեսագիտության ու կառավարման ինստիտուտի փոխտնօրեն, տնտեսագիտության դոկտոր, պրոֆեսոր Անաստասիա Անդրեևնա Սոզինովան։
Այցը կազմակերպվել է ՀՀ ԿԳՄՍՆ բարձրագույն կրթության և գիտության կոմիտեի «Գիտական արդյունավետության խթանման դրամաշնորհային ծրագիր - 2025» մրցույթի «Հայաստանի Հանրապետության միջազգային տարանցիկ տրանսպորտային ուղիների զարգացման խնդիրները» թեմայով դրամաշնորհի (ծածկագիր՝ 25RG-5B145) շրջանակում՝ կատարված աշխատանքներն ամփոփելու, հետագա հետազոտական ուղղությունները նախանշելու և գիտաուսումնական համագործակցության նոր հնարավորությունները քննարկելու նպատակով։ Պրոֆեսոր Անաստասիա Սոզինովան թեմայի օտարերկրյա գործընկերն է։ Դրամաշնորհային ծրագրի գիտական ղեկավարը ԵՊՀ տնտեսագիտության և կառավարման ֆակուլտետի կառավարման և գործարարության ամբիոնի դոցենտ Հարություն Զաքոյանն է։ Ծրագրում ընդգրկված է նաև նույն ամբիոնի պրոֆեսոր, տնտեսագիտության դոկտոր Վահրամ Աբրահամյանը։
Այցի ընթացքում տեղի են ունեցել գիտական քննարկումներ՝ նվիրված Հայաստանի միջազգային տարանցիկ տրանսպորտային ուղիների զարգացման հիմնախնդիրներին, առկա մարտահրավերներին, դրանց լուծման հնարավոր ուղիներին և զարգացման հեռանկարներին։
Բացի դրանից՝ գիտական սեմինար է անցկացվել նաև Գորիսի պետական համալսարանում, որտեղ քննարկվել են Հայաստանի միջազգային տարանցիկ տրանսպորտային ուղիների զարգացման հիմնախնդիրները, դրանց արդյունավետության բարձրացման հնարավորությունները և հետագա զարգացման հեռանկարները։
Այցի կարևոր արդյունքներից էր ԵՊՀ տնտեսագիտության և կառավարման ֆակուլտետի և Վյատկայի պետական համալսարանի տնտեսագիտության ու կառավարման ինստիտուտի միջև համատեղ գիտաուսումնական համագործակցության հիմնական ուղղությունների նախանշումը։
Գիտական աշխատանքներին զուգահեռ՝ կազմակերպվել են նաև այցելություններ Հայաստանի պատմամշակութային վայրեր։
ԵՊՀ տնտեսագիտության և կառավարման ֆակուլտետը կարևորում է միջազգային գիտական համագործակցության զարգացումը՝ որպես գիտահետազոտական ներուժի ամրապնդման, նոր գիտական նախաձեռնությունների ձևավորման և գիտակրթական միջավայրի զարգացման կարևոր ուղղություն։ Օտարերկրյա գործընկերների ներգրավմամբ կատարվող համատեղ հետազոտություններն ու մասնագիտական քննարկումները նպաստում են ֆակուլտետի գիտական օրակարգի ընդլայնմանը, գիտելիքի և փորձի փոխանակմանը, ինչպես նաև միջազգային գիտակրթական համագործակցության նոր հնարավորությունների ձևավորմանը։
