ԵՊՀ կենսաբանության ֆակուլտետի Կենսաքիմիայի, մանրէաբանության և կենսատեխնոլոգիայի ամբիոնի ավագ գիտաշխատող, կ.գ.թ, դոցենտ Ինգա Բազուկյանը գիտակրթական համագործակցությունների շրջանակում նախաձեռնել էր Սուրբ Կլիմենտ Օրքիդսկու անվան Սոֆիայի պետական համալսարանի գենետիկայի ամբիոնի վարիչ, կ․գ․թ․ Սվետոսլավ Դիմովի «Մետագենոմիկայի կիրառությունները կաթնամթերքի արտադրության մեջ» («Applications of metagenomics in dairy products research») և Պլովդիվի Սննդի տեխնոլոգիայի համալսարանի կենսատեխնոլոգիայի ամբիոնի վարիչ Վելիտչկա Գոտչևայի «Սննդի որակի և անվտանգության կառավարում» («Food Quality and Safety Management») թեմաներով դասախոսությունները։
Սվետոսլավ Դիմովի ներկայացրած դասախոսության առաջին մասը վերաբերում էր մետագենոմիկական վերլուծության տեսությանը: Մանրամասն ներկայացնելով նյութը՝ զեկուցողն ուսանողներին փոխանցեց հիմնարար գիտելիքներ թեմայի վերաբերյալ:
Երկրորդ մասում գիտնականն անդրադարձավ բուլղարական ավանդական պանիրների յուրահատկությանը, ապա մետագենոմիկական վերլուծությանը՝ պանիրների միկրոբիոմի ուսումնասիրման համար:
Նմանօրինակ աշխատանքներ կատարվում են նաև Կենսաքիմիայի, մանրէաբանության և կենսատեխնոլոգիայի ամբիոնում: Ուստի՝ այսպիսի հանդիպումները հետագա համագործակցության ամրապնդման և միջազգային ծրագրերին մասնակցության համար հիմք կդառնան:
Պրոֆեսորը պատասխանեց ուսանողների հնչեցրած բազում հարցերի՝ պանրագործության ստացման ողջ ընթացքում (հում կաթի մշակումից մինչև հասուն արտադրանք) մանրէների կազմի փոփոխույթան, ճշգրիտ վերլուծությունների համար անհրաժեշտ բազային տվյալների, ծրագրային գործիքների և այլնի վերաբերյալ:
Դասախոսությունը շարունակեց Վելիտչկա Գոտչևան, որը ներկայացրեց Պլովդիվի Սննդի տեխնոլոգիայի համալսարանի կառուցվածքը և կրթական ծրագրերը:
Այցելությունն իրականացվեց ԵՊՀ-ի և վերոհիշյալ երկու համալսարանների միջև կնքված «Erasmus KA131» ծրագրի շրջանակում: Ս.թ. ապրիլի 28-ին կայացած դասախոսության ընթացքում առաջարկ եղավ նույն ծրագրով կատարել նաև ուսանողների փոխանակում, ինչը հնարավորություններ կստեղծի ուսանողների շրջանում նոր մեթոդների յուրացման և հետագա կիրառման համար:
Դասախոսության ընթացքում գիտնականը ներկայացրեց սննդի արտադրությունում առաջացող խնդիրները, քիմիական, ֆիզիկական և մանրէաբանական անվտանգության վերահսկողության ժամանակակից մոտեցումները և եվրոպական ստանդարտները: Ակտիվ բանավեճ ծավալվեց հրավիրյալ դասախոսների և ուսանողների միջև, որն առնչվում էր սննդի արդյունաբերությունում գենետիկորեն ձևափոխված օրգանիզմների օգտագործմանը: Գիտնականները փաստեցին, որ գենետիկորեն ձևափոխված օրգանիզմների կիրառությունը սննդի արդյունաբերությունում իրականում ոչ մի վտանգ չի ներկայացնում. դրանց օգտագործումը պայքարի միջոց է համաշխարհային սովի դեմ:
Նմանատիպ դասախոսությունները և այցերը մեծ նշանակություն ունեն ուսանողության շրջանում մասնագիտական գիտելիքների խորացման, գիտության նկատմամբ հետաքրքրության ամրապնդման, իսկ գիտնականների դեպքում միջազգային համագործակցության ու կապերի հաստատման համար:
