Ս.թ. դեկտեմբերի 2-ին Հայ-ռուսական (սլավոնական) համալսարանում տեղի ունեցավ «Ինքնությունների փոխակերպումը հետխորհրդային տարածաշրջանում» թեմայով կլոր սեղան-քննարկումը: Միջոցառումը կազմակերպվել էր ԵՊՀ հայագիտական հետազոտությունների ինստիտուտի և Հայ-ռուսական համալսարանի Կ. Ա. Միրումյանի անվան քաղաքագիտության ամբիոնի համատեղ ջանքերով՝ միավորելով քաղաքագիտության և սոցիալական գիտության առաջատար մասնագետների:
Հայ-ռուսական համալսարանի Կ. Ա. Միրումյանի անվան քաղաքագիտության ամբիոնի վարիչ, ԵՊՀ հայագիտական հետազոտությունների ինստիտուտի հայ-ռուսական հարաբերությունների գիտաշխատող Հովհաննես Սարգսյանը նշեց, որ հետխորհրդային տարածքն ունի Ռուսական կայսրության և Խորհրդային Միության օրոք ձևավորված ընդհանուր ինքնության էական հիմք։ Նա նշեց, որ անկախությունից հետո պետականաշինության գործընթացները ուղեկցվել են ազգայնականության աճով, որը Հարավային Կովկասի մի շարք երկրներում դրսևորվել է այսպես կոչված «գաղութատիրական համախտանիշով»՝ հեռանալով Ռուսաստանից և զարգացնելով սեփական ազգային ինքնությունը։
ԵՊՀ հայագիտական հետազոտությունների ինստիտուտի հայ-ռուսական հարաբերությունների բաժնի վարիչ, ք.գ.դ., պրոֆեսոր Աշոտ Ենգոյանը ներկայացրեց ինքնության ձևավորման վերաբերյալ իր տեսլականը։ Նա ընդգծեց, որ այսօր տեղի ունեցողը ոչ թե ինքնության փոխակերպում է, այլ ինքնության կառուցում, որը թափ է հավաքում և կարող է հանգեցնել ինչպես խորացող ինտեգրման, այնպես էլ տարածաշրջանի երկրների միջև անհամաձայնության խորացման։
«Ինքնությունը ազգի ինքնաճանաչումն է, որը հենված է զարգացած քաղաքական և էթնիկ ինքնագիտակցության վրա: Խորհրդային շրջանում բազմաթիվ էթնիկ ընդհանրություններ ի հայտ եկան որպես ազգեր: Ազգային ինքնագիտակցության ձևավորման գործընթացը շարունակվում է նաև մեր օրերում։ Դրա բովանդակությունը կախված է ժողովուրդների և էլիտաների փոխազդեցությունից։ Ինքնության ազգային տեսլականը ձևավորում և տարածում են էլիտաների ներկայացուցիչները՝ շատ անգամ պայմանավորված իրենց իսկ շահերով և պատկերացումներով»,- հավելեց Ա. Ենգոյանը:
Միջոցառումը մասնակիցներին հնարավորություն տվեց քննարկելու ազգային ինքնության ձևավորման, պետության և ազգի միջև փոխհարաբերությունների վերաբերյալ հիմնախնդիրները, ինչպես նաև գնահատել պատմական և մշակութային հիմնաշերտերի ազդեցությունը տարածաշրջանում տեղի ունեցող ժամանակակից գործընթացների վրա։
