ԵՊՀ ֆարմացիայի ինստիտուտում ս․թ․ փետրվարի 17-ին և 19-ին «էրազմուս+» (Erasmus PEERS) շրջանակում կայացավ մասնագիտական դասախոսությունների շարք, որը նվիրված էր դեղերի անվտանգության հետազոտմանը և կարգավորող դաշտի հեռանկարներին:
Միջոցառման բանախոսն էր ոլորտի համաշխարհային ճանաչում ունեցող մասնագետ, դոկտոր Մարիա Տերեզա Հերդեյրոն (Maria Teresa Herdeiro): Նա Ավեյրուի համալսարանի (Պորտուգալիա) բժշկական գիտությունների բաժնի դոցենտ է, որը ղեկավարում և համակարգում է Բիոբժշկության ինստիտուտի (iBiMED) հետազոտական ուղղությունները: Ըստ «Scopus» հեղինակավոր գիտաչափական շտեմարանի տվյալների՝ դոկտոր Մ. Տ. Հերդեյրոն հեղինակ է 157 գիտական փաստաթղթերի, որոնք ունեն ավելի քան 4,500 մեջբերում, իսկ նրա գիտական ազդեցության բարձր մակարդակը փաստում է 33 h-index ցուցանիշը: Ունենալով կենսաբժշկական գիտությունների դոկտորի որակավորում (Habilitation) և լինելով «EMA»-ի դեղազգոնության կոմիտեի անդամ՝ նա ուսանողներին ներկայացրեց դեղագործության ամենաբարդ և պատասխանատու ուղղություններից մեկը:
Երկօրյա հանդիպումների ընթացքում (փետրվարի 17-ին և 19-ին) մասնակիցները ծանոթացան միջազգային մի քանի գործընթացների և ընդունված հասկացությունների: Դեղազգոնության վերաբերյալ թեմայի քննարկման առանցքում դեղերի կողմնակի ազդեցությունների զեկուցման կարևորությունն էր: Բանախոսն անդրադարձավ թերզեկուցման խնդրին (երբ բուժաշխատողները չեն հայտնում նկատված կողմնակի ազդեցությունների մասին) և վերջինիս՝ բուժառուների առողջության վրա թողած հետևանքներին: Ռիսկերի կառավարման քննարկման ընթացքում մանրամասնվել է ռիսկերի կառավարման պլանի կառուցվածքը: Հատուկ շեշտվել են անվտանգության բնութագրերը՝ հայտնի և հնարավոր ռիսկերը և դեղազգոնության պլանը՝ ռիսկերի հայտնաբերմանն ուղղված հետագա գործողությունները: Կարգավորող և ԵՄ ստանդարտների մասին թեմայի շրջանակում ներկայացվել են Եվրոպական միության Volume 9A ուղեցույցները և հետշուկայական անվտանգության հետազոտությունները, որոնք թույլ են տալիս վերահսկել դեղի անվտանգությունը դրա գրանցումից և շուկայահանումից հետո:
Դասախոսություններն ինստիտուտի ուսանողների ու դասախոսների շրջանում մեծ հետաքրքրություն առաջացրին: Հանդիպումների ընթացքում ծավալվեց ակտիվ քննարկում, մասնակիցները հանդես եկան բազմաթիվ հարցադրումներով, որոնք վերաբերում էին ինչպես մասնագիտական նրբություններին, այնպես էլ ոլորտի համաշխարհային զարգացումներին:
Սույն այցը հիմք դարձավ նաև հետագա սերտ համագործակցության համար: Կողմերը պայմանավորվածություն ձեռք բերեցին շարունակելու համատեղ աշխատանքը գիտական և կրթական ուղղություններով: Հատուկ կարևորվեց ուսանողների և դասախոսների մասնակցությունը «Էրազմուս+» փոխանակման ծրագրերին, ինչը հնարավորություն կտա օգտվելու ստեղծված նոր կապերից և վերապատրաստվելու եվրոպական առաջատար գիտական կենտրոններում:
Միջոցառումը հերթական կարևոր քայլն էր ԵՊՀ ֆարմացիայի ինստիտուտի միջազգայնացման և ուսանողներին օգուտ-ռիսկ հարաբերակցության գնահատման եվրոպական փորձին հաղորդակից դառնալու ճանապարհին:
