Կյանքի 95-րդ տարում իր մահկանացուն է կնքել ՀՀ ԳԱԱ թղթակից անդամ, ՀՀ գիտության վաստակավոր գործիչ, տնտեսագիտության դոկտոր, պրոֆեսոր Գրիգոր (Գրիշա) Ղարիբյանը:
Գրիգոր (Գրիշա) Ղարիբյանը ծնվել է 1930 թվականի մայիսի 25-ին ՀԽՍՀ Սիսիանի շրջանի Բորիսովկա (այժմ` ՀՀ Սյունիքի մարզի Ծղուկ) գյուղում:
1946 թվականին ընդունվել է Երևանի Փ. Թերլեմեզյանի անվան նկարչական ուսումնարան: 1948 թվականին ավարտել է Երևանի կայարանի երեկոյան դպրոցը, 1954 թվականին` ԵՊՀ տնտեսագիտության ֆակուլտետը, 1962-ին` ասպիրանտուրան: 1963 թվականին պաշտպանել է թեկնածուական, 1973-ին` դոկտորական ատենախոսություն: 1978-ին նրան շնորհվել է պրոֆեսորի կոչում: 2000 թվականին ընտրվել է ՀՀ ԳԱԱ թղթակից անդամ:
1954-ից Գրիշա Ղարիբյանն աշխատել է ԵՊՀ-ում. 1978-1990-ական թվականներին եղել է քաղաքատնտեսության ամբիոնի, 1990-2008-ին՝ տնտեսագիտության տեսության ամբիոնի վարիչ, 1977-1978-ին՝ ԵՊՀ կուսկոմիտեի երկրորդ քարտուղար, 1978-1991-ին՝ հումանիտար ֆակուլտետների ուսումնական աշխատանքների գծով պրոռեկտոր: 1984 թվականին նրա նախաձեռնությամբ Երևանի ժողովրդական տնտեսության ինստիտուտից տնտեսագիտական կիբեռնետիկայի ֆակուլտետը տեղափոխվել է ԵՊՀ և հետագայում դարձել Տնտեսագիտության (այժմ՝ Տնտեսագիտության և կառավարման) ֆակուլտետ: 1993-2000 թվականներին եղել է այդ ֆակուլտետի դեկան, 2001-2023-ին՝ Տնտեսագիտության և միջազգային տնտեսական հարաբերությունների ամբիոնի պրոֆեսոր և «ԵՊՀ ամբիոնի պատվավոր վարիչ»:
1965-1975 թվականներին Գրիշա Ղարիբյանը համատեղությամբ գլխավորել է ՀԽՍՀ պետպլանի ԳՀ ինստիտուտի սոցիալական զարգացման բաժնի աշխատանքները:
2002-2018 թվականներին ԵՊՀ տնտեսագիտության մասնագիտական խորհրդի նախագահն էր:
Անվանի գիտնական, պրոֆեսոր Գրիգոր (Գրիշա) Ղարիբյանը հեղինակ է գիտական ավելի քան 100 աշխատության, այդ թվում՝ «Բնակչության կենսամակարդակը և նրա բարձրացումը Սովետական Հայաստանում» (Եր., 1972 թ.) և «Проблемы повышения уровня жизни населения в социалистическом обществе» (Ер., 1977 г.) մենագրությունների, համահեղինակ` «Հայաստանի Հանրապետության սոցիալ-տնտեսական զարգացման և մարդկային կապիտալի վերարտադրության հիմնախնդիրները անկախության տարիներին» (Եր., 2017 թ.) մենագրության, ինչպես նաև` «Մինչմոնոպոլիստական կապիտալիզմ» (Եր., 1971 թ.), «Մարդկային զարգացման հիմունքներ» (Եր., 2004 թ.) ուսումնական ձեռնարկների և «Տնտեսագիտություն» (Եր., 2004 թ.) բուհական դասագրքի:
Պրոֆեսոր Ղարիբյանի ղեկավարությամբ պաշտպանվել է թեկնածուական 50 ատենախոսություն:
Իր հայրենանվեր գործունեության համար անվանի գիտնական, պրոֆեսոր Գրիշա Ղարիբյանը 1999-ին պարգևատրվել է Մովսես Խորենացու մեդալով, 2010-ին արժանացել է ՀՀ գիտության վաստակավոր գործչի կոչման:
2018 թվականին Երևանի Հովհաննես Շարամբեյանի անվան ժողովրդական արվեստների թանգարանում բացվել է նրա գեղանկարների անհատական ցուցահանդեսը:
Անվանի գիտնական և տնտեսագետ Գրիշա Ղարիբյանի շուրջ 70-ամյա բեղուն գործունեությունը ԵՊՀ-ում և հատկապես Տնտեսագիտության ֆակուլտետի վերաբացման, ինչպես նաև հետագա զարգացման գործում անգնահատելի է: 90-ականներին ֆակուլտետում ծավալված փոփոխությունները նոր թափ և համակարգային ընդգրկում ստացան Գրիշա Ղարիբյանի՝ որպես դեկանի պաշտոնավարման ժամանակահատվածում գործադրված ջանքերի և նվիրումի շնորհիվ: Նրա անմիջական և արհեստավարժ կառավարման ընթացքում ֆակուլտետը համալսարանի կազմում առանձնացավ որպես փորձառու մասնագիտական կառույց՝ կրթական ոլորտում արձանագրած նշանակալի ձեռքբերումներով և գիտական բարձր մակարդակով:
Գրիշա Ղարիբյանի վաստակը մեծ է նաև երիտասարդ մասնագետների՝ որպես հայրենասեր քաղաքացիների, արժանապատիվ հայերի կերտման գործում:
ԵՊՀ տնտեսագիտության և կառավարման ֆակուլտետի ղեկավարությունն ու ՀՀ ԳԱԱ նախագահությունն իրենց ցավակցությունն են հայտնում անվանի գիտնական, պրոֆեսոր Գրիշա Ղարիբյանի ընտանիքին, հարազատներին, գործընկերներին, Հայաստանի Հանրապետության կրթական և գիտական համայնքին։
Գրիշա Ղարիբյանի՝ ԵՊՀ գիտակրթական կյանքում ունեցած մեծ և անուրանալի վաստակն ու ներդրումը՝ որպես ժառանգություն, ընդմիշտ կմնա Հայաստանի Հանրապետության բարձրագույն կրթության և գիտության պատմության մեջ։
ԵՊՀ տնտեսագիտության և կառավարման ֆակուլտետ
ՀՀ ԳԱԱ նախագահություն
