ԵՊՀ շրջանավարտների ֆորում․ համալսարանը՝ լոկալ և գլոբալ խնդիրների արձագանքող

Բնական ռեսուրսները՝ առաջնահերթություն

ԵՊՀ եվրոպական ուսումնասիրությունների կենտրոնի Ռոբերտ Շումանի անվան սրահում տեղի ունեցած պանելային քննարկումը նվիրված էր բնական ռեսուրսների կառավարման առաջնահերթություններին։ Հիմնական հարցադրումները հնչեցին այն մասին, թե ինչպես պետք է Հայաստանը կառավարի իր կենսառեսուրսները փոփոխվող կլիմայի և տնտեսական ճնշումների պայմաններում։

Մոդերատոր Գայանե Շահնազարյանի (ՀՀ ՇՄՆ «Հիդրոօդերևութաբանության և մոնիթորինգի կենտրոն») վարած քննարկմանը մասնակցեցին ոլորտի առաջատար փորձագետներ Արման Վարդանյանը («ԶՊՄԿ» ՓԲԸ տեխնիկական տնօրեն), Սևակ Բալոյանը (ՀՀ ՇՄՆ կենսառեսուրսների կառավարման վարչության պետ) և Աստղիկ Դանիելյանը (ՄԱԶԾ, «ԵՄ-ն Սևանի համար» ծրագրի համակարգող), որոնք ներկայացրին թե՛ քաղաքական, թե՛ տեխնիկական լուծումների իրենց տեսլականը։

Թեմայի տրամաբանական շարունակությունն էր նաև «Ֆիզիկական աշխարհ» խորագրով մեկ այլ քննարկում՝ նվիրված կենսաբազմազանությանը, բնակլիմայական պայմաններին ու գլոբալ տաքացման մարտահրավերներին։ Մոդերատորն էր ԵՊՀ կենսաբանության ԳՀԻ տնօրեն Կարեն Թռչունյանը։ Լևոն Ազիզյանը (ՀՀ ՇՄՆ «Հիդրոօդերևութաբանության և մոնիթորինգի կենտրոն»), Հովիկ Սայադյանը (Գերմանիայի միջազգային համագործակցության կազմակերպություն) և Նոնա Բուդոյանը (ՀՀ ՇՄՆ) ներկայացրին թե՛ տեղական կլիմայական միտումները, թե՛ կենսաբազմազանության պահպանման խթանման հնարավոր գործիքները։ Քննարկումը ցույց տվեց, որ բնական համակարգերի պաշտպանությունը պահանջում է գիտության, կառավարման ու տեղական գործողությունների համադրված ջանք։

Տիեզերքը՝ որպես նոր սահման

ԵՊՀ գիտական խորհրդի նիստերի դահլիճում միաժամանակ անցկացվեց «Տիեզերք և տեխնոլոգիաներ» խորագրով քննարկում՝ նվիրված տիեզերքի ուսումնասիրման հեռանկարներին։ Մոդերատորն էր ԵՊՀ ֆիզիկայի ինստիտուտի տնօրեն Խաչատուր Ներկարարյանը։ Հայաստանում տիեզերքի դիտարկման հնարավորությունների, համագործակցության միջազգային հարթակների և տեխնոլոգիական զարգացումների ազդեցության վերաբերյալ հարցերի շուրջ քննարկմանը ելույթ ունեցան Ֆելիքս Ահարոնյանը (ԵՊՀ), Գարիկ Իսրայելյանը («Սթարմուս», առցանց), Վալերի Համբարյանը (Ենայի համալսարան, առցանց) և Արամ Սահարյանը (ԵՊՀ)։ 

Հաջորդ սեկցիայում թվային աշխարհը ներկայացավ բոլորովին այլ՝ կիրառական տեսանկյունից։ «Կրիսպ» ընկերության համահիմնադիր Դավիթ Բաղդասարյանի մոդերացմամբ քննարկվեցին կրթության, գիտության, կառավարման ու տնտեսության թվայնացման հեռանկարները: Ելույթ ունեցան Նարեկ Մելքոնյանը («PMI Science»), Տիգրան Սարգսյանը («Սինոփսիս») և Աշոտ Արզումանյանը («Սմարթգեյթ»)։

Տնտեսություն՝ նոր մոդելների փնտրտուքի ճանապարհին

Տնտեսագիտական թեմաներով քննարկումները Շառլ Ազնավուրի անվան մշակույթի կենտրոնում ընթացան երկու փուլով։ Առաջին փուլում անդրադարձ եղավ Հայաստանի՝ միջազգային ինտեգրացիոն ծրագրերին, իսկ երկրորդում՝ ձեռնարկատիրական միջավայրի բարելավման հնարավորություններին։ Մոդերատորը Քաղաքակրթական և մշակութային հետազոտությունների կենտրոնի փորձագետ Աննա Գևորգյանն էր։ Ելույթ ունեցան ինչպես հայաստանյան փորձագետներ, այնպես էլ միջազգային գործընկերներ, այդ թվում՝ Մասաչուսեթսի համալսարանից Արմեն Բայբուրդյանը (առցանց), ՄԱԿ-ի գրասենյակի ներկայացուցիչ Արտակ Այունցը, «Ֆրիդրիխ Էբերտ» հիմնադրամից Նարեկ Սուքիասյանը և Հումանիտար հետազոտությունների կենտրոնից Աշոտ Ոսկանյանը։

«Ձեռնարկատիրական միջավայրը Հայաստանում, բարելավման հնարավորություններ» թեմայով սեկցիայում քննարկման մոդերատորը ԵՊՀ տնտեսագիտության և կառավարման ֆակուլտետի դեկան Կառլեն Խաչատրյանն էր։ Թեմայի շուրջ տեսակետներ հայտնեցին «Բիբլոս Բանկ Արմենիա» ՓԲԸ գլխավոր գործադիր տնօրեն Հայկ Ստեփանյանը, «Լիդիան Արմենիա» ՓԲԸ գործադիր տնօրեն Հայկ Ալոյանը, ՄԱԶԾ սոցիալ-տնտեսական զարգացման ծրագրերի ղեկավար Աննա Գյուրջյանը և «Երևանի կոնյակի գործարան» ՓԲԸ գործադիր տնօրեն Սերգեյ Խաչատրյանը։

Լեզուն և պատմությունը՝ մշակութային ինքնության հիմքում

ԵՊՀ պատմության թանգարանում անցկացված սեկցիաները բացահայտեցին, թե ինչպես է լեզուն ձևավորում մտածողություն, ինչպես պետք է վերլուծել և ինչպիսի մոտեցումներով դասավանդել պատմությունը։ Բանախոսների թվում էին ՀՀ լեզվի կոմիտեի նախագահ Սիրանուշ Դվոյանը, արձակագիր Գևորգ Տեր-Գաբրիելյանը, լեզվաբան Հասմիկ Ջիվանյանը, պատմաբաններ Արսեն Բոբոխյանը, Վահրամ Տեր-Մաթևոսյանը և ոլորտի այլ մասնագետներ։

ԵՊՀ Սարգիս և Մարի Իզմիրլյանների անվան գրադարանում ամփոփվեց ԵՊՀ շրջանավարտների համայնքի կայացմանն ու գործունեության արդյունավետության բարձրացմանը նվիրված քննարկումը։ Աշխատանքային խմբի նիստում հաստատվեց, որ համալսարանը ոչ միայն կրթական, այլև գաղափարական կենտրոն է, մի վայր, որտեղ ձևավորվում է հանրային քաղաքականություն՝ համադրելով փորձը, հետազոտությունը և սերունդների միջև շարունակական երկխոսությունը։