«Միավորված ազգերի կազմակերպության Երևան մոդել-2025». համաշխարհային խնդիրների լուծումները՝ երիտասարդների աչքերով

Քառօրյա համաժողովը յուրահատուկ հարթակ է, որտեղ երիտասարդները հնարավորություն են ստանում մասնակցելու քննարկումների, ներկայացնելու որևէ երկիր ՄԱԿ-ի կոմիտեում, ապա՝ տարբեր պետությունների դիրքորոշումները, ներգրավվելու համաշխարհային խնդիրների լուծման գործընթացում։ 

«Միավորված ազգերի կազմակերպության Երևան մոդել-2025» համաժողովի հիմնադիր նախագահ, «YereMUN» ՀԿ ղեկավար Վրույր Հլղաթյանն ընդգծեց համաժողովի առաքելությունն ու տարեցտարի աճող կարևորությունը։ 

««YereMUN»-ը մի հարթակ է, որտեղ երիտասարդները հավաքվում են քննարկելու միջազգային նշանակության կարևոր հարցեր՝ Սիրիայի ճգնաժամից մինչև Իրանում տիրող իրավիճակին առնչվող հարցեր, ինչպես նաև համաշխարհային մարտահրավերներ, օրինակ՝ պլաստիկի օգտագործման դեմ պայքարը և այլն։ Սա պարզապես կրթական միջոցառում չէ․ այստեղ ձևավորվում են ապագայի պատասխանատու քաղաքացիներ և դիվանագետներ»,- նշեց նա։

Վրույր Հլղաթյանը նաև անդրադարձավ այս տարվա համաժողովի հիմնական առանձնահատկությանը՝ մասնակիցների թվին։ Ի տարբերություն նախորդ տարվա՝ այս անգամ համաժողովին մասնակցում են մոտ 160 մասնակիցներ թե՛ Հայաստանից, թե՛ արտերկրից՝ Ֆրանսիայից, Գերմանիայից, Կանադայից, ՌԴ-ից, Բելառուսից, Աֆրիկայից և մի շարք այլ երկրներից։

Իր ելույթում դիվանագետ Մհեր Մարգարյանը կարևորեց քառօրյա համաժողովին աշխարհի տարբեր երկրներից և Հայաստանից մեծ թվով երիտասարդների մասնակցությունը։ Նա մատնանշեց, որ համաժողովը փաստում է ՄԱԿ-ի արդիական դերը, ինչպես նաև երիտասարդ սերնդի պատրաստակամությունը՝ ներգրավվելու միջազգային գործընթացներում։

«Ձեր ակտիվ հետաքրքրվածությունը՝ մասնակցելու միջազգային թեմաներ արծարծող քննարկումներին, ՄԱԿ-ի կոմիտեների սիմուլյացիոն խաղերին և բանակցություններին, վկայում է այն մասին, որ այսօր երիտասարդությունը հրաժարվում է միջազգային հարթակներում պասիվ դիտորդ լինելուց։ Դուք պատրաստակամ եք բարձրաձայնելու հարցեր, պահանջելու հաշվետվողականություն և ձևավորելու աշխարհը, որտեղ ապրում եք։ Մասնակցելով այս սիմուլյացիոն խաղին՝ դուք անում եք ավելին, քան պարզապես ձեր ուժերը պաշտոնական ընթացակարգերում փորձելը։ Դուք սովորում եք դիվանագիտության հիմունքները՝ ուշադիր լսելու, կոնսենսուսի հասնելու, համոզիչ և հարգալից բանակցելու արվեստը»,- եզրափակեց Մհեր Մարգարյանը։

ՀՀ-ում Սերբիայի Հանրապետության նորանշանակ դեսպան Տատյանա Պանայոտովիչ-Ցվետկովիչը շեշտեց երիտասարդների հետ շփման կարևորությունը՝ ընդգծելով, որ նրանց նոր գաղափարներն ու էներգիան դիվանագիտական ոլորտում երկար տարիներ աշխատողների ներշնչանքի աղբյուր են։

«Դիվանագետ դառնալու ցանկություն ունեցող երիտասարդները պետք է իմանան, որ սա պարզապես առավոտյան 9-ից մինչև երեկոյան 5-ը կատարվող աշխատանք չէ․ դիվանագետ լինելն ապրելակերպ է։ Երբ խոսում եմ դիվանագիտության մասին, միշտ հիշում եմ ՅՈՒՆԵՍԿՕ-ի կանոնադրությունից հետևյալ տողերը․ «Պատերազմները սկսվում են մարդկանց մտքերում, և հենց մարդկանց մտքերում է, որ պետք է կառուցել խաղաղության պաշտպանությունը»։ Կարծում եմ` սա է դիվանագիտության էությունը։ Մեր առաքելությունն է առավելագույնս նպաստել երկխոսությանը, բանակցություններին և խորհրդակցություններին, քանի որ պատերազմները ոչինչ չեն տալիս։ Վաղ թե ուշ պատերազմներն ավարտվում են, սակայն դրանց հետևանքները լինում են աղետալի՝ զոհեր, ավերումներ․․․ Եվ ի վերջո մենք կրկին վերադառնում ենք բանակցության սեղանի մոտ։ Մենք պետք է ուժեղացնենք դիվանագիտության դերը և ազդեցությունը»,- ընդգծեց դեսպան Պանայոտովիչ-Ցվետկովիչը։

Պատվիրակ Մարիամ Ստամբոլցյանը, որը սովորում է 11-րդ դասարանում, ժամանել է Պրահայից՝ մասնակցելու «YereMUN 2025» համաժողովին, որի մասին տեղեկացել է ընկերուհուց։ Նրանք միասին եկել են Երևանի պետական համալսարան՝ որպես պատվիրակներ քննարկելու առանցքային հարցեր։

«Շատ եմ կարևորում այս համաժողովի անցկացումը, քանի որ այն հնարավորություն է տալիս դեռ դպրոցական տարիքից ծանոթանալու համաշխարհային կարևոր հարցերի, զարգացնելու կարծիք արտահայտելու, բանավիճելու ու տարաբնույթ խնդիրների լուծումներ առաջարկելու հմտությունները»,- ասաց նա։ 

Բազմիցս Հայաստան այցելած, սակայն առաջին անգամ ԵՊՀ-ում գտնվող կանադահայ Ադամ Բարսեղը եկել է Կիպրոսից։ Նա ընդգծեց՝ շատ ուրախ է ԵՊՀ-ում գտնվելու և ոգևորված՝ իր պատվիրակությունն առաջնորդելու համար։

««YereMUN 2025»-ը ինձ մեծ հնարավորություններ է տալիս զարգացնելու իմ գիտելիքներն ու կարողությունները դիվանագիտության, միջազգային հարաբերությունների և իրավունքի ոլորտներում։ Սա նաև հիանալի առիթ է նոր մարդկանց հանդիպելու, աշխատելու պատվիրակությունների այլ նախագահների հետ, որոնց հետ նախկինում շփվելու հնարավորություն չեմ ունեցել»,- նշեց 12-րդ դասարանում սովորող պատվիրակ Ադամը, որի նախագահած կոմիտեի քննարկման թեման Հյուսիսային Կորեայի միջուկային ծրագիրն է և նրա դերը՝ որպես տարածաշրջանային անկայունության պատճառ։ 

Միջազգային համաժողովը եզակի հնարավորություն է զարգացնելու բանակցային հմտությունները, ավելի լավ հասկանալու միջազգային հարաբերությունների բարդությունները և հաստատելու երկարաժամկետ գործակցային կապեր։ Այն ոչ միայն բանավեճերի հարթակ է, այլև առիթ՝ շփվելու դիվանագետների, դեսպանների հետ և գտնելու նոր ընկերներ աշխարհի տարբեր անկյուններից։