ԵՊՀ տնտեսագիտության և կառավարման ֆակուլտետում ս.թ. մարտի 23-27-ը աշխատանքային այցով հյուրընկալվել էր Սանկտ Պետերբուրգի պետական համալսարանի տնտեսագիտության ֆակուլտետի կառավարման և սոցիալ-տնտեսական գործընթացների պլանավորման ամբիոնի դոցենտ, տնտեսագիտության թեկնածու Ելենա Վալերիի Կուլչիցկայան։ Այցը կարևոր էր երկու հաստատությունների միջև ձևավորված համագործակցության զարգացման և խորացման տեսանկյունից։
Ելենա Կուլչիցկայան այցի շրջանակում հանդիպում ունեցավ ֆակուլտետի դեկան, դոցենտ Կառլեն Խաչատրյանի հետ, որի ընթացքում քննարկվեցին համագործակցության զարգացման հնարավոր ուղղությունները՝ ներառյալ համատեղ գիտական հետազոտություններ կատարելու, կրթական ծրագրերի մշակման հեռանկարները, ինչպես նաև ակադեմիական փորձի փոխանակման նոր ձևաչափերը։
Դեկան Կառլեն Խաչատրյանը ընդգծեց, որ ֆակուլտետը կարևորում է միջազգային համագործակցության շարունակական ընդլայնումը՝ նպատակ ունենալով ձևավորելու բաց, համագործակցային և գիտելիքի փոխանակման վրա հիմնված ակադեմիական միջավայր։ Նրա խոսքով՝ օտարերկրյա գործընկերների հետ ձևավորվող կապերը հաճախ վերածվում են երկարաժամկետ և արդյունավետ ինստիտուցիոնալ համագործակցությունների, իսկ Ելենա Կուլչիցկայայի հետ ձևավորված գործընկերությունը դրա հաջողված օրինակներից է։ Դեկանը շնորհակալություն հայտնեց ռուս գործընկերոջը համագործակցության զարգացման գործում ունեցած ներդրման համար։ Այցի ընթացքում Ե. Կուլչիցկայան ֆակուլտետի դեկան Կ. Խաչատրյանին փոխանցեց Սանկտ Պետերբուրգի պետական համալսարանի տնտեսագիտության ֆակուլտետի դեկանի կողմից ուղարկված գիրք։
Նշենք, որ համագործակցության շրջանակում Ե. Կուլչիցկայան համալսարանական գիտական սեմինարին հանդես եկավ զեկուցմամբ՝ ներկայացնելով հայ գործընկերների հետ համատեղ կատարած հետազոտության արդյունքները և արժևորելով համատեղ աշխատանքի գիտական և կիրառական նշանակությունը։ Հատկանշական է, որ սա ռուս գործընկերոջ երկրորդ այցն էր ֆակուլտետ, ինչը վկայում է ոչ միայն համագործակցության շարունակականության, այլև ձևավորված փոխվստահության և գործընկերային ամուր հիմքերի մասին։
Այցի ընթացքում դոցենտ Ե. Կուլչիցկայան նաև բակալավրիատի ուսանողների համար հանդես եկավ դասախոսություններով։ «Կառավարում» մասնագիտության 3-րդ կուրսի ուսանողները հնարավորություն ունեցան լսելու «Կառավարչական որոշումների արդյունավետության գնահատման մեթոդները» թեմայով դասախոսությունը, իսկ «Ֆինանսներ» մասնագիտության ուսանողները լսեցին դասախոսություն «Սպառողի ուղին» թեմայով։ Դասախոսությունները առանձնացան իրենց կիրառական ուղղվածությամբ և ինտերակտիվ բնույթով։
Աշխատանքային հանդիպումների շրջանակում ձեռք բերվեցին պայմանավորվածություններ Երևանի պետական համալսարանի տնտեսագիտության և կառավարման ֆակուլտետի և Սանկտ Պետերբուրգի պետական համալսարանի տնտեսագիտության ֆակուլտետի միջև ձևավորված համագործակցությունը խորացնելու ուղղությամբ:
