«Արհեստական բանականության զարգացմամբ ավելի կբարձրանա մարդու կատարած աշխատանքի արդյունավետությունը». ԵՊՀ շրջանավարտ Արտավազդ Մինասյան

Արտավազդ Մինասյանը վստահ է՝ արհեստական բանականության զարգացման շնորհիվ մարդկանց աշխատանքի արդյունավետությունն ավելի կբարձրանա: 

- Պարո՛ն Մինասյան, ինչպե՞ս են ծնվում նոր գաղափարները, ի՞նչ քայլերից հետո են դրանք կյանքի կոչվում: 

- Շուկան ուսումնասիրելուց և հաճախորդների հետ խոսելուց հետո ձևավորվում են գաղափարներ, որոնք այդուհետ անցնում են մի քանի փուլեր՝ թե՛ ներքին՝ թիմային, թե՛ արտաքին ներդրողների հետ քննարկումներ: Այնուհետև ստեղծվում է արտադրանքի նախատիպը, դրա հիման վրա էլ՝ առաջին տարբերակը, որը տարվում է շուկա: Այս գործընթացում հասկանում ենք, թե որ արտադրանքն է պետք մեր թիրախային հաճախորդներին:

- Ի՞նչ մասնագետներ են ներգրավված Ձեր գիտահետազոտական խմբում: 

- Մեր մասնագիտական թիմում ընդգրկված են գիտնականներ, «web» ծրագրավորողներ, «mobile» ծրագրավորողներ։ Ընկերությունում առկա են մարքեթինգի բոլոր ճյուղերը, այդ թվում՝ ապրանքի որակի մարքեթինգ, բրենդինգ, վաճառքի բաժին և այլն:

- Առաջիկայում ի՞նչ գիտական նորույթ եք առաջարկելու:

- Այս պահին «Կրիսպ»-ում աշխատում ենք առոգանության (ակցենտի) փոխարկման տեխնոլոգիա ստեղծելու ուղղությամբ՝ ֆրանսիական անգլերենից ամերիկյան անգլերեն, եգիպտական անգլերենից բրիտանական անգլերեն: Բացի դրանից՝ մյուս բոլոր ակցենտներից փորձում ենք իրական ժամանակում ստանալ ակցենտի փոխակերպում:

- Հայաստանում ի՞նչ տեմպով են զարգանում գիտանորարարական ընկերությունները: Նրանց գործունեությունը խթանելու համար ի՞նչ խնդիրներ պետք է լուծվեն։ Ինչի՞ պակաս ունենք՝ գիտական մտքի՞, ֆինանսի՞, թե՞ նյութատեխնիկապես հագեցած լաբորատորիաների:   

- Հայաստանում մեծապես զարգացել է ստարտափ էկոհամակարգը։ Եթե տասը տարի առաջ վենչուրային ֆինանսավորում էր ստացել 1-2 ընկերություն, ապա այս պահին այդ ընկերությունների թիվը հասնում է մի քանի տասնյակի։ Առկա են մոտ հինգ վենչուրային ֆոնդեր, որոնք ապահովում են ֆինանսավորումները:

Ըստ իս՝ գիտանորարարական ընկերությունների գործունեությունը խթանելու համար անհրաժեշտ է մեծացնել ֆինանսավորումը, գիտակրթական համակարգը ավելի մոտեցնել ինդուստրիային, որ ավելի շատ տաղանդավոր գիտնականներ և հետազոտողներ միանան գիտանորարարական ընկերություններին:

- Արհեստական բանականությունը (AI), կարելի է ասել, գրավում է աշխարհը․ ներկայում գրեթե չկա այնպիսի ոլորտ, որը չառնչվի AI տեխնոլոգիաներին: AI-ը նույնիսկ հիվանդանոց ու վիրահատարան է «մտել»՝ բժշկելու, վիրահատելու մարդկանց: Ո՞ր մասնագիտություններն են վտանգված, ո՞ր ոլորտներում է մարդկային գործոնը նվազագույնի հասցվում:

- Արհեստական բանականությունը կիրառվելու է գրեթե բոլոր ոլորտներում, ինչպես նշեցիք՝ սկսած բժշկությունից, վերջացրած պետական կառավարումով ու ծրագրավորումով։ Սակայն չեմ կարծում, որ դա շատ արագ տեղի կունենա: Ես հակված եմ այն մտքին, որ AI-ը դառնալու է շատ լավ գործիք՝ նպաստելով մարդկանց աշխատանքի արդյունավետության բարձրացմանը:

- AI-ի զարգացմամբ, ինչպես նաև տեխնիկայի ու տեղեկատվության հեշտ հասանելիության պայմաններում մի կողմից՝ է՛լ ավելի զարգանալու, մյուս կողմից՝ առանց մեծ ջանքեր գործադրելու պատրաստի նյութ՝ հետազոտություն ստանալու ճանապարհ է բացվել: Գիտնականների թվի ա՞ճ, թե՞ նվազում է սպասվում այս պայմաններում:

- Գիտնականների թիվն աշխարհում աճելու է, քանի որ այժմ՝ ավելի քան երբևէ, շատ ավելի հեշտ է կատարել գիտահետազոտական աշխատանք: Մեծ ընկերությունները (ինչպիսիք են «OpenAI»-ը, «Microsoft»-ը, «Google»-ը) փորձում են ստեղծել այնպիսի արհեստական բանականություն, որ գիտական հետազոտություններն աշխարհում շատանան: Այս մոտեցման արդյունքում ներկայում անբուժելի համարվող բազմաթիվ հիվանդություններ ապագայում կդառնան բուժելի, բազմաթիվ խնդիրներ, որոնց մարդկությունն առնչվում է, նորարար գիտելիքի միջոցով կլուծվեն, և արհեստական բանականությունը խնդիրները լուծելու լավագույն գործիքներից մեկը կդառնա:

Նշենք, որ ֆիզիկամաթեմատիկական գիտությունների թեկնածու Արտավազդ Մինասյանը, բացի «Կրիսպ» ստարտափից, նաև «10Web» ստարտափի համահիմնադիրն է: «Կրիսպ»-ը ինչպես մեծ ընկերություններին, այնպել էլ փոքր թիմերին և անհատներին հնարավորություն է տալիս հեռախոսազանգերի ժամանակ հեռացնելու աղմուկն այնպես, որ լսվի միայն զրուցակիցների մաքուր ձայնը, կատարելու առոգանության փոփոխություն, տառադարձություն և այլն: Իսկ «10Web»-ը կայքէջի կառուցման AI հարթակ է, որի շնորհիվ առանց կայքէջի կառուցման հիմնարար գիտելիք ունենալու՝ հնարավոր է ստեղծել կայքէջեր:

ԵՊՀ շրջանավարտների առաջին ֆորումի ժամանակ շրջանավարտների գերազանցության հավաստագրի արժանացավ նաև «Կրիսպ» ընկերությունը՝ «Տիեզերք և տեխնոլոգիաներ» անվանակարգում: «Կրիսպ»-ի համահիմնադիր, ԵՊՀ շրջանավարտ Դավիթ Բաղդասարյանը մրցանակը ստանալիս ընդգծեց, որ իրենց աշխատողների մեծ մասը ևս ԵՊՀ շրջանավարտներ են: